پاکستان کے صوبہ پنجاب میں سیلاب کی تباہ کاریاں،

---

جلال پور پیر والا کے قریب موٹروے کا حصہ پانی میں بہہ گیا، ٹریفک ،کے لیے بند

ملتان (سحر نامہ خصوص رپورٹ)  

 بھارت کی جانب سے پانی چھوڑے جانے کے بعد بپھرے دریاؤں نے جنوبی پنجاب میں بھی تباہی مچا دی۔ جلال پور پیروالا کے قریب سیلابی پانی کے شدید دباؤ کے باعث ملتان–سکھر موٹروے (M-5) کا ایک حصہ بہہ گیا جس کے بعد موٹروے کو ٹریفک کے لیے مکمل طور پر بند کر دیا گیا ہے۔

جنوبی پنجاب میں تباہی کی نئی لہر

اگرچہ دریاؤں میں پانی کی سطح میں کچھ کمی آئی ہے، لیکن جنوبی پنجاب کے اضلاع میں سیلابی صورتحال تاحال سنگین ہے اور سیلاب کا ریلا سندھ کی جانب بڑھ رہا ہے۔

• شجاع آباد: دریائے چناب میں طغیانی کے نتیجے میں 15 موضع جات زیرِ آب جبکہ 17 موضع جات جزوی طور پر متاثر ہوئے۔ اب تک 4000 سے زائد افراد کو ریسکیو کیا جاچکا ہے۔
• جلال پور پیر والا: دریائے چناب اور دریائے ستلج کے پانی نے 80 دیہات کو ڈبو دیا۔ 80 ہزار سے زائد متاثرین کو ریسکیو کیا گیا جبکہ کئی لوگ تاحال پھنسے ہوئے ہیں۔
• مظفر گڑھ: پانی کی سطح کم ہونے کے باوجود ہزاروں بستیاں زیرِ آب ہیں، 2000 گھروں کو نقصان پہنچا جبکہ 30 ہزار متاثرین امداد کے منتظر ہیں۔
• لیاقت پور: پانی اترنے کے باوجود کئی علاقے زیرِ آب ہیں۔ متاثرین سخت گرمی میں کھلے آسمان تلے زندگی گزارنے پر مجبور ہیں۔

مزید متاثرہ علاقے

• چشتیاں: 47 موضع جات پانی کی لپیٹ میں، جن میں راجوشاہ، بونگہ جھیڈ اور میرن شاہ نمایاں ہیں۔
• اوچ شریف: 25 دیہات پانی میں ڈوب گئے اور زمینی رابطہ منقطع ہوگیا۔
• علی پور: دریائے ستلج، راوی اور چناب کے پانی نے کئی بستیاں ڈبو دیں۔ ہیڈ پنجند سے 2 لاکھ 87 ہزار کیوسک کا ریلا گزر رہا ہے۔ علی پور سے سیت پور کا زمینی راستہ بحالی کے عمل میں ہے۔
• راجن پور و روجہان: سیلاب متاثرین مشکلات کا شکار ہیں جبکہ پانی کا ریلا سندھ کی طرف بڑھ رہا ہے۔ کوٹ مٹھن پر دریائے سندھ میں اس وقت 6 لاکھ کیوسک پانی کی روانی ہے۔

موٹروے پر خطرناک صورتحال

سیلابی پانی کے بہاؤ نے موٹروے ایم-5 کو شدید نقصان پہنچایا ہے۔ جلال پور پیر والا کے قریب ٹنل کے پاس دراڑیں پڑنے کے باعث موٹروے کے دونوں اطراف سے پانی گزر رہا ہے جس کے بعد ٹریفک کی بحالی فی الحال ناممکن ہے۔

---

📌 سحر نامہ کا تجزیہ:
جنوبی پنجاب اس وقت بدترین سیلابی صورتحال کا شکار ہے۔ لاکھوں متاثرین حکومتی و غیر سرکاری امداد کے منتظر ہیں۔ سب سے بڑا چیلنج متاثرہ علاقوں میں محفوظ راستوں اور خوراک کی فراہمی ہے۔ ماہرین کے مطابق آنے والے دنوں میں سیلابی ریلا سندھ کے مختلف اضلاع کے لیے بھی خطرے کی گھنٹی ہے۔

---